Yanzu haka wasu mafarauta uku da ke kauyen Nsofang a karamar Hukumar Etung ta Jihar Kuros Riba za su dandana kudarsu sakamakon zarginsu da aka yi na kashe wasu giwaye guda uku. Doka ce mai tsanani a jihar ga duk wanda aka samu da laifin kama wani naman dawa da sunan farauta.
Majiyar Aminiya ta shaida cewa wadanda ake zargin sun aikata laifin ne a dajin kauyen Edondong na karamar Hukumar Ikom.
Da yake karin haske kan lamarin, Mista Arikpo Ikom, kwamishinan ma’aikatar kula da gandun daji da kare muhalli ta jihar, ya ce giwayen baki ne suka yiwo kaura daga dajin Tagamanda a Jamhuriyar Kamaru.
Wakilinmu ya yi kokarin jin ta bakin mafarautan a ofishin ’yan sanda, amma hakan ya ci tura, kodayake mai magana da yawun rundunar, DSP John Imoh ya tabbatar da afkuwar lamarin.
