Shugaba Muhammadu Buhari ya gana da Ministan Tsaro Manjo Janar Bashir Magashi mai ritaya da Hafsan Hafsoshin Tsaro Janar Gabriel Olonisakin.
Sun yi ganawar ta sirri ne ranar Talata a Fadar Shugaban kasa da ke babban birnin tarayya, Abuja.
Ba a fitar da wata sanarwa a hukumance game da tattaunawar ba.
Sai dai wata majiya a Fadar ta ce tattaunawar ta mayar da hankali ne a kan yadda zanga-zangar #EndSARS ke daukar sabon salo tana bigewa da tashin-tashina a sassan kasar da dama.
Kawo yanzu dai an ayyana dokar hana walwala a jihohin Edo da Legas da Filato da Osun da kuma Ondo, bayan da aka yi zargin cewa wasu bata-gari sun karkatar da akalar zanga-zangar zuwa fashe-fashe da kone-kone da ma kashe-kashe a wasu wurare.
