Ranar Lahadin da ta gabata ne masu ruwa da tsaki a kungiyar kwallon kafa ta Enugu Rangers suka sallami Kocin kungiyar mai suna Benedict Ugwu tare da duk daukacin masu dafa masa baya bayan da kungiyar ta Rangers ta yi rashin nasara karo na uku a jere a wasannin da ka fara gudanarwa na Gasar Firimiya ta kasa ta 2019/2020 da Hukumar wasa ta kasa (NPFL) take shiryawa.
Kwamishinan Matasa da Wasanni na Jihar Enugu, Bitus Okechi shi ne ya bayyana sallamar Kocin bayan da Enugu Rangers ta sha kashi a gida da ci 2-0 a hannun kungiyar kwallon kafa ta Akwa Starlets (Dakkada) FC of ta garin Akwa Ibom.
An baiwa Ugwu rikon kwaryar horar da ’yan wasan kungiyar ne tun a watan Juli bayan da wa’adin kwantaragin Koci Gbenga Ogunbote. Wanda ya tafiyar da ragamar kungiyar daga 2017 zuwa 2019.
A halin yanzu tsohon dan wasan Najeriya Sylbanus Okpala, shi ne ya karbi ragamar kungiyar daga hannun tsohon Koci Coach Benedict Ugwu wanda ake ma lakabi da ‘Surugede’.
Okpala, wanda ya horas da kungiyar Rangers a baya, ana sa ran zai jagoranci kungiyar da ake ma lakabi da Flying Antelopes zuwa ga nasara da zarar sun fara Gasar cin kofin kungiyoyin Afirka nan gaba a ranar 1 ga watan Disamba.
Rangers ta kasa cin wasanni uku da ta buga a gere a gasar da ake fafatawa ta kasa.
Kungiyar MFM ta ci Rangers 1-0 a wasansu da suka buga na farko a Enugu sannan kuma ta sha kashi a hannun Ribers United a wasanta na biyu a gari Fatakwal kafin kuma daga baya Akwa Starlets ta lallasata da ci 2-0.
Femi Abayi na Akwa Starlets shi ne ya far jefa kwallo a ragar Rangers a cikin mintina 16 da fara wasa, kafin daga bisani Isaac George ya sake cinsu a minti na 43.
Kyaftin din Akwa starlets, Aniekam Ekpe, ya bayyana cewa dama sun shirya sarai don ganin sun yi wannan nasara.
Nasarar da kungiyar “MFM ta samu akan Rangers ita ce ta ba mu gwarin gwiwar kaiwa ga wannan nasara.”
“Yanzu ba ma jin tsoron haduwa da kowace kungiya da take fafatawa a a wannan gasa ta kasa. Domin kwallo ta gaji nasara ko faduwa.
“Starlets ta yi canjaras har sau biyu kenan a wasannin da muka buga a waje, kuma za mu ci gaba da samun nasara a wasanninmu na waje.
“Rangers suna da kyau amma dai yau sun ci da gigal, domin tsarin da muka yi ya kai mana.,” in ji shi.
Ekpe ya ci gaba da cewa kungiyar ta su tana bakin kokarinta na ganin ta tara maki da yawa tun a farko-farkon gasar
“Mun ga kungiyoyin da suka hauro kuma aka fafata da su cikin wannan gasa ta NPFL amma daga karshe sai su fado, don haka wannan irin tashin gishirin andir din ne muke kokari kauce ma wa.” Ekpe ya fada.
