✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Feleken fadancin fuffukar fifita fada

Fi’ili Falle falalen fili Dandalin daddale dalili Ci-makar cikamakon cikin cokali Bini-binin bala’in balbali   Fadanci Fadan ci-mu-ci Fir’aunanci Fataken fifita fatauci Fasahar furta furuci…

Fi’ili

Falle falalen fili

Dandalin daddale dalili

Ci-makar cikamakon cikin cokali

Bini-binin bala’in balbali

 

Fadanci

Fadan ci-mu-ci

Fir’aunanci

Fataken fifita fatauci

Fasahar furta furuci

 

Fadace-fadace

Fuffukar fetsar fusace

Fasko fulakon fice-fice

Fiffige farce

Fantamawar farin fitacce

 

Zunzurutun zari-ruga

Zuga-zugin zuga

Zautuwar zazzaga

Zabarin zanga-zanga

Zarge-zargen zirga-zirga

 

Zancen zabi-sonka

Zuki-ta-malle

Zantukan ’yan lele

Zagayen Babanle

Zalamar rani da kaka

 

Jama’a na cikin kunci

Ba a nema musu sassauci

Jan ragama ake ta kulafuci

Gama-garin al’umma ake wa butulci

 

Mulkin mulka’un makirci

Jaruman jar-miya

Jagororin jagaliya

Jiga-jigan jijjiga jamhuriya

Jimurdar jami’an jirgiya

Juye jujin jama’ar jam’iyya

 

Gangakon gururum

Guna-gunanin gungun gum

Gwagwa-gwagwa gwararam

Gwangwanin gwamna gwam

Gwamnoni gwarangwam

 

Shiriritar shashancin share-share

Shirmen shantakewar shure-shure

Shuhurar shaharar shahrarre

Shirin shirgin faskare

Sharrin takure-takure

 

Gwamnonin tsintsiya

Sun shige shigifa

Sun tattauna batun kan akaifa

Matsalar al’umma ba dubiya

Mulkin mulaka’u suke tarairaya

 

A tsaunin Bila

A kai ganawar harkalla

Baba an biya masa dalla-dalla

Karatunsu ba wasulla

Sai na tsala musu bulala

 

Damuwarsu jar-miya

Juya akalar jam’iyya

Jan ragamar Haurobiya

Takun sakarsu da sarkiya

Sun gaza warware sasarin tsiya

 

 

Taron shan shayi

Kun maishe da al’umma bayi

Ba ku da tausayi

Jihohinku na wani matsayi

Talakawanku na jin kaikayi

 

Ku dubi makomar danboto

Da tai karfin katoto

Dukiyar kasa ta lakume koto

Har aka gaji da kai rahoto

Yau ta zam hoto

 

An yi musu kwarmato

Suka cinye masara saura toto

Curin matsaloli suka yanko da zarto

Abun muhimmanci an mayar tsito

Kwansu da kwarkatarsu sui ta fito

 

A tsakaninsu akwai baraka

Jam’iyya za a fatattaka

’Yan siyasar sara-suka

Sun kai wa Baba kuka

Makircinsu ne na turaka

 

Barakarku ku dinke da basilla

Watangaririyar wahala

Mummunar manufa kuka kulla

Wuni-wunin wala-wala

Kuri’un al’umma nai muku talala

 

Kanku kuka sani

Zalunci kun gaza hani

Kyakkyawan aiki kun ki umarni

Ku dai a baku makami

Kui ta lakuma ba ji ba gani

 

Yawansu sili da kofar hanci

Za su jefa jama’a kunci

Kuri’u ku kai wa butulci

Ba ku da kimar kare mutunci

Wannan ne rashin azanci

 

Gagarumin ganganko

Kwakwar kwankwadar koko

Cika-cikin soko

A kammala a afka tarko

Kui ta kwambon bokoko

 

Kui karatun ta-natsu

Al’umma ta matsu

Kurungun wasu ya motsu

Suna jin dudufniyar mutsu-mutsu

Da tsuwwa tsu-tsu

 

Ana ta nuna wa juna yatsu

Su bar al’umma ta warwatsu

Ana ta fuffukar tashin tsuntsu

Har an gwamutsu

Ya za ai a kimtsu

 

Fi’ilin feleken fadancin fafutikar fuffukar  fifita fada a mamakon makamar marasa mahangar mutunta mutuncin mutane, wadanda suka yi ganganko a fadar tsaunin bila, don dinke barakar batan-baka-tantan a jam’iyyarsu, maimakon dimbin matsalolin da ke ci wa al’ummarsu tuwo a akushi. Gangankon gungun gwamna gwarangwam da gararambar garkame gambu gam, wata manufa ce ta nuna son-kai da kullin kudirin kululun kiyayyar wadanda suka kada musu kuri’ a jihohinsu.

 

Sakamakon garkame gambu gararam gam-gam babu wani dan rahoto da ya ruwaito irin wainar da aka toya a fadar mulkin Haurobiya a yayin ganawar da aka yi tsakanin Baban-burin-huriyya da gungun gwamnonin jam’iyyar tsintsiya da ke ta shiririta share duk wanda zai kawo musu cikas a zabi-sonka, ta hanyar tada kwanjin karajin kassara abokan hamayya. Manufarsu dai ba ta wuce yadda za su kai mamaya, su ji ana kayya-kayya ba. Masu kulla-kullar uwardaka da ke hankoron dinke baraka, sun nuna babu soyayya sai dai kiyayya a tsakaninsu da ’yan dangwalen kuri’a, wannan batu da babu mai cewa a’a, domin babu ba’a.

 

Watakila gungun gwamna gwaran-gwam da suka hallara a fadar mulkin Haurobiya, inda suka gana da Baban-burin-huriyya kan matsalolinsu na kashin kansu, don daidaita dandamalin dumuiniyar danniya da murdiyyar hamayyar mamayar mutane, suna ganin wannan shi ne abin da ya dace. Alal hakika sai mun gaya musu sun kauce, sun susuce.

 

’Yan makarantar Dodorido mahayan shorido, lallai ya zame mana tilas, kada mu bari a kawo mana cikas, gudun kada su jikkata jikkunanmu su yi lilis, don su ji dadin cin bagas; in ba a yi sa’a ba su ma su yi ragas, a wajen gasa rigis,  kun ga an yi canjaras.

 

Lallai a yasar da Bundun-bundun din Bandirawo da Gundumin gadarar gudumar gandun gada-gadar aika-aika da Langar langabewar Lalo da Burgar bugun-gudu da Zullumin zakwadin zalamar zulum, kai akwai jerangiyar jami’an jigata jama’a fa!

 

Tsagwaron tsarabar tsumburen gwamnonin jam’iyyar tsintsiya wasan warwasawar watangaririyar  wa-ka-ci-ka-tashi ne, ta hanyar kauce kin la’akari da tsomomuwar tsawwalar tsadar tsidahun tsugudidin tsangwamar al’umma. Wannan dai duk KATOBARAR KINBIBIN KARON-BATTA ne da masu mulkin mulaka’un makirci ke kwarzantawa. Kuma wannan na nuni da cewa, ‘an yi shakulatun bangaro da halin da gama-garin al’umma ke ciki.’ To sai ku yi karatun ta-natsu, domin al’umma ta matsu, har ta kai ga kurungun wasu ya motsu suna ta jin dudufniyar mutsu-mutsu da tsuwwa tsu-tsu. A irin wannan yanayi ana ta nuna wa juna yatsu an kyale  al’umma ta warwatsu, kusan kowa na fuffukar tashin tsuntsu har an gwamutsu; shin ta yaya za a kimtsu?

 

Haurobiyawa, ba za su yi jimirin jin wadansu ’yan tsirari na zirya a fadar tsaunin bila da ke Haurubja, babban birnin Haurobiya, don kawai su yi tufka da warwarar matsalolin da suka daure musu kurungu, ba tare da la’akari da wakilcin al’umma da nauyaye-nauyayen da ya rataya a kurungunsu ba. Matukar Baban-burin-huriyya bai fara fatattakar masu gabatar masa da tsilli-tsilin matsalolin kan akaifa  da suka dugunzuma damuwarsu, to wadanda suka kada musu kuri’un zabi-sonka ba lallai ne su sake bari a ci gaba da ZARI-RUGA ba. Sannan Malam mai yaren Hau-hau wajen hawan sa ba tare da sa-in-sa ba, ya furta cewa, ‘akwai ranar kin hada-hadar cinikin haja, ranar duk da ta maigari ta shiga garari.’

 

Ka da fa miyagun fadawa su yi wa Baban-burin-huriyya ingiza mai kantu ruwa. Kodayake dai an ce a ba yin mugun babban mutum mai rawani, har sai an samu iza wutar sare-sarin sanwar miyagun fadawa. Lallai Baba ka baje na-zomo, ka gwale na-mujiya ku yi kiri da muzu. Sannan ka yi kokarin fasko duk wani labarin kanzon kurege da suka baje maka.

 

Gani ga wane dai an ce ‘ya ishi wane tsoron Mai-duka.’ Ku dubi makomar jam’iyya sandar jirge danboto, wadda ta yi karfa-karfan karajin karfin katoto, inda ta tattara dukiyar kasa ta yi koto, har ta kai ga an  gajiya wajen kai rahoto, yau ta zama huhun ma’ahun hoto. Gwamnonin tsiwar tsikaro tsiyatakun tsiya-tsiyar tsautsayin tsayuwar tsintsiya ko kuna da muradin sake kwatawa ne?