Da Dumi Dumi

Gagarumar gararumar Girgoriya (1)

Gagarumar gararumar Girgoriya (1)

Gagarumar gararumar Girgoriya

Gargarar kwanakin shekara

Wadanda suka shude aka tara

Sabuwar kirga aka fara

Yawan kwanaki aka bibiya

ADVERTISEMENT

 

Tuni aka bude babin Hijiriyya

Kwanaki sun yi zirya

Makonni sun yi jerangiyya

Watanni ake ta kidaya

Masu kirge na tattara tariya

 

Mabudi

Abin warware kulli

A samar da kafar bulli

Ballin maballi

Ai babu rudi

 

Ga goro

Goriya kwararo-kwararo

Sange sanhon sunkutar sauro

Samarin kusu a soro

Mahukunta na ta taro

 

Kolo zai ga budi

Titibiri an sammasa sudi

Ga sauran madi

A dan tauna ridi

Malam na ta hankoron badi

 

Tsohuwa sai ta ji dadi

An samu zaren kadi

Dan mazari na tsallen kwadi

Kada na ta tumbudi

Goriyar goro da gardi

 

Mai Magana da kaudi

Tambadar yamadidi

Gayyar na gayyaron sodi

Daga bara zuwa badi

Aka fasko masu rawar kidi

 

Kwankwadar modar modi

Wasu sun salwantar da kudi

Ayyuka na hanzarin dodon kodi

Na-mujiya baibye da burbudi

Lamura na sararaf sididi

 

Magarkama

Makwararar makama

Magangarar masu himma

Gajiya na sa hamma

Gayu na ta hauma-hauma

 

Mabubbuga

Mahanga

Mai kwarar damar sanga

Kwaranyar kaya ba daga

Ko taka kwaranga

 

A dai leka ta taga

’Yan kwadago ai jinga

Karin lada ake ta kirga

Labarai aka kaga

Nika da sara ke da dudduga

 

Masunta su dumfari Baga

Argungawa sun ja zuga

Ja-hadewa na Jijjiga

Kayan miya uwargida ta jajjaga

Masu fafutika an ja tunga

Haramar hijiriya

Gangamin Girgoriya

Lissafin kwanakin duniya

Damarar mutan Haurobiya

Tsillin matsaloli soke a kibiya

 

Gwamnati tai kasafi

Mun wasa balati tai kaifi

Za mu yanki abin hasafi

Ka da dai mui laifi

Mu cika ciki mui tufafi

 

’Yan dugwi-dugwi ga tallafi

Masu agaji ai wakafi

Ai girka miyar farfesun kifi

A kawar da cuta masu dafi

Gidaddaji ai musu rufi

 

Masu zuwa rafi

Ai musu burtsatse mai rufi

Sha da shayarwa tai kafi

Ba sauran zuwa kududdufi

Mabubbugar ruwa za mui dafifi

 

Ci da ciyarwa

Sha da shayarwa

Biyayyar bibiya da baiwa

Tsarin ga da ban shawa

Kowa ya diba ba kokowa

 

Al’umma

A hada karfi da hukuma

Mahukunta ban da hadama

Kowa yai kama-kama

Don a samu makama

 

Baban-burin-huriyya

Ka kara kaimin kariya

Da aiki a Haurobiuya

Tunkarar miyagun turjiya

Ka da dai a gajiya

 

Saurayin-kirinki

Ban da kwaramniyar bariki

Ka daina bugun taiki

Ka wancakalar da jaki

Lallai ka lizimci aikin kirki

Dogarin rafkiya

Kai karo da kofaton kwafdiya

Ka yasar da waskiya

Da kwarakar karafkiya

Ko kutungwilar tsiya

 

Samarin-kusu

Ku yi watsi da kurmusu

Wai ku kosassu

Talakawanku busassu

Tekun zari-ruga ku as sarakan su

 

A daina duma wasoso

A hana talaka wankan sabulun soso

Miyagu na ta rawar koroso

Mara galihu yai kafar kaujen faso

Ko dai haka ake so

 

Mai sana’ar na-duke

Yabanya in ta sarke

Ka daina sake-sake

Ban da noke-noke

Wajen aiki sai a kuke

 

Damina rani da kaka

Ai ta turka-turka

A gayauna da garka

Kiwon bisashe ba shakka

Sa’a ce aka taika

 

Jaddawalin zabuka

Ana ta zabarin zababbaka

Fatanmu kar ai aika-aika

Masu zabi-sonka

Kowa ya dukufa da fafutika

 

Mu zabo nagargaru

Na- mujiyarmu na gani kuru-kuru

Ka da a ce mun kuru

An fasko kaji da zakaru

Shugabanni su zam zakakuru

 

Ai karatun babbaku da farfaru

Mu fasko masu shigar sunkuru

Da ke mana ’yan dabarbaru

Manufarsu tauna gurguru

Talakawa tsiyaku nai musu guru

 

Jama’a

Miyagun ayyuka mu ce a’a

Mu yasar da wargin ba’a

Alwallarmu ba lam’a

Tafarkin rayuwa ya zam sa’a

 

Mu dai mui da’a

Da kyautata dabi’a

Fuskokinmu su zam fara’a

Mui fafutikar sana’a

Da warware sasarin San’a’a

Share