Kwamandan rundunar kwastam na jihohin Oyo da Osun, Kwanturola Richard Oteri ya roki sarakuna da shugabannin al’umma su ci gaba da wayar da kan jama’a a game da illar fasa-kwauri da irin barazanar da yake haifarwa ga harkokin tsaron kasa.
Ya ce, “Duk masu sha’awar shiga hada-hadar kasuwanci da kasashen ketare su zo mu yi musu bayani, mu ba su muhimman shawarwari don bunkasar kasuwancinsu, amma fasa-kwauri na janyo hasarar dukiya da yi wa tattalin arziki zagon kasa.”
Kwanturola Oteri, ya yi wannan kira ne a ranar Alhamis a ofishinsa da ke Ibadan yayin da yake yi wa taron ’yan jarida bayanin nasarorin da rundunar ta samu a cikin watanni 4 na farkon shekarar 2013.
Ya ce kudaden haraji da rundunar ta tara a wannan lokaci ya haura na bara da karin kashi 17 na jimlar kudin. Daga cikin kayayyakin da rundunar ta yi nasarar kamawa, akwai buhunan shinkafa guda 2,716; da wasu kananan motoci da jif-jif guda 28; da katon katon na yankakkun kaji guda 2,500; da wata babbar mota dauke da kwalayen sababbin takalma guda 700; da wata motar bas da aka cika ta da haramtattun suturu daban-daban; da tayoyon mota guda 521; da wata motar tirela da aka yi mata lodin buhuna 600 na abincin dabbobi; duk wadanda kwanturolan ya nuna wa ’yan jarida. Daga cikin kayayyakin har da kwalayen hasasan da rundunar da kama.
Kwanturola Richard ya ce, “Rundunar kwastam ta kasa, a karkashin Kwanturola-Janar Abdullahi Dikko Inde, ta wadata mu da kayan aiki, shi ya sa muke gudanar da aiki wajen durkusar da fasa-kwauri da samar da kudaden shiga aljihun gwamnati. Akwai bukatar jama’a, musamman wadanda ke kusa da iyakokin kasa su bayar da tasu gudunmawar tona masu fasa-kwauri da sababbin dabarun shigowa da kayayyaki ta haramtacciyar hanya.
