✕ CLOSE Noma Da Kiwo Hotuna Kiwon Lafiya Girke-Girke Sana'o'i Kimiyya da Kere-Kere Ra'ayin Aminiya Ra’ayoyi Rahoto
Click Here To Listen To Trust Radio Live

Labe-laben lokon lungunan Lantsandan

Labarin logar lokon Lantsandan Labi-labin lungunan Lamuran laftun lambunan Lage-lagen liliya ligidin Lakakin lulawar laulayin layin   Bikin balaguron Baba Barka da aiki na-gaba Bude…

Labarin logar lokon Lantsandan

Labi-labin lungunan

Lamuran laftun lambunan

Lage-lagen liliya ligidin

Lakakin lulawar laulayin layin

 

Bikin balaguron Baba

Barka da aiki na-gaba

Bude burgami kawo tsaraba

Bukatun kasa akwai tsaba

Bagiren rabon riba

 

Bitar balaguron Baba

Batun balullubar bulalar babba

Bahallatsar bugi-in-bugar ’yan uba

Ba mai tarairayar ’ya’yan Abba

Balle a hana su zama ’yan daba

 

Zaman dirshan da kashe fatari

Gwamna yai watsi da kofar hancin dari

’Yan kwadago sun shiga garari

Malamin shari’a yai hanin korar dubbai kari

Yaya za a kwance kulli mai  kamari

 

Zangon wa’adin karamin lauje

Baba ya take yai waje

Haurobiyawa ana kada musu jauje

Wahalhalu sun sa an barbaje

Dauje-daujen kaujen kuje-kuje

 

Sasarin Tayar-Landan

Samfarera tai kadan

Masu fasa-kwauri na dandan-dandan

Salon sauyin kidan

Sai sunkurun shukar irin

Sasarin sarkakiyar sassa

Sare-sarin sa-in-sa

Soshe-soshen susa

Sunkurun sammatsin Saman-bisa

Salebar suburbuda tusa

 

Garkar gayauna

Fardar manya da saura kananan

Rani da damina

Komai-da-komai an zana

Mui himma mu samu yabanya bana

 

Sharafin share-share

Shafin shuhurar shahararre

Shasshekar shure-shure

Shu’unin shakare-shakare

Sansanin sagaraftun sare-sare

 

Biye-biyen Birtaniya

Sassarfar sagaraftun Sawun-diyya

Rabashen romon rummacen Rasha

Fantsamar fartsar Parisan Pasha

Dumuiniyar duniya

 

An dai ga tasku

Kitimurmurar karafkiyar kanku-da-kanku

Jimurdar jikkatar jan jakunkunanku

Cike-ciken cake cikakku

Doke-doken dagewar dokakku

 

Motsuwar motsattsu

Watsa-watsan watsewar watsattsu

Toliyar turnukun tutsu

Botsare-botsaren botsararrun butsu

Kade-kaden kantsame kotson kutsu

 

Haurobiya

Ai ta yawo a rariya

Al’umma na bukatar kariya

An hana babakere da danniya

Tsananin tsanin tsaunin tsinin tsintsiya

 

Tsinkayar tsetsewalar tsuntsuwa

Tsororuwar tsayuwar tsuwwa

Tsautsayin tsiya-tsiyar tsiwa

Tsumulmular tsumburen tsomomuwa

Tsurkun tsukukun tsince-tsincen tsakuwa

 

Jin jikin jmami jim

Ciye-ciyen cin cingam

Kame-kame kan kam

Tanke tanka tamau tantam

Kinkimar kaya kinkim

 

Duhun-dundum-durundum

Dundu dudundum

Dundumi dum

Darkaki dururum

Dudufdniya dugu-dugu dugum

 

An baje na-mujiya

Hantsewar hajar hajijiya

Halin halartowar hawaniya

Shangululun sharholiya

Bugun bayin balbalin bulaliya

 

Batun Baballiya

Carin corin curiya

Hargagin hankakiya

Balbelar benun biye-biyen bibiya

Mamakon mamungar mikiya

 

A dau hanya mikakkiya

Ban da bundun-bundun din baudaddiya

Canke-canken cinikayya

Ci-makar camamar ciyayya

Tattalin tulun tuttule taraliya

 

Tun bayan da Baban-burin-huriyya ya sake darewa karagar mulkin jan ragamar Haurobiyawa a karo na karamin lauje, wanda aka yi wa lakabin MATATTAKALAR TAKUN GABA (amma in babu gaba da giba), ake ta kada wa al’ummar kasar nan jauje, suna dandana a kudarsu, yayin da Baba yake takewa ya yi waje. Labarin labi-labin lungunan logar lokon lumtsumawar lage-lagen liliya ligidin lakakin lulawar laulayin layin lamuran laftun lambunan Lantsandan an ce ya baibaye fadin duniya, musamman yadda aka yi ta ka-ce-na-ce a shafukan mujallu da makalun watsattsaken jaridu a ciki da wajen Haurobiya. Hasali ma wadannan batutuwa da suka shafi RUGUMNIYAR RARUMAR RIKON RAGAMA an yi ta tufka su a shafukan TUKIN-TUWON-TITI da FUSKANTAR-BOKOKO da WATSO-ZUFFA, tare da daukacin sakonnin MASHAKATAR LILO DA TSALLAKE-TSALLAKE.

Bisa wannan dalili, sai wadansu suka shiga bitar balaguron Baba da batun balullubar bulalar babba a bahallatsar bugi-in-bugar ’yan uba (ko ’yan adawar dama-damar dumuiniyar damuwar dawa ne?), wadanda suka ki hada karfin karfen karafa wajen tarairayar ’ya’yan Abba, don gudun kada su karke da zama ’yan daba. Rashin tarairayar biyayya da al’umma ta samu a fadin kasar nan, shi ya haifar wa al’umma sasarin dabaibayin tsilli-tsillin matsalolin rayuwa. Kuma aka samar da dimbin shagabannin al’umma da suka himmatu ka’in-da-na’in wajen shan-gaban gamarin al’ummar kasar nan. Ba dai sai na yi ta nanatawa ba, kusan kowane dan makarantar nan yana sane da karatan SAMARIN-KUSU da ’YAN MATAN JABA DA GAFIYA, wadanda tun bayan dawowa kan tafarkin damon-kurdiya, suka yi ta tsuwurwurta tsarin DAMO-DA-KURA-DA-DIYYA, tare da DAMA-DAMA-DA-KURDA-KURDAR-TSIYA, inda mugun aikinsu ke ta yadon yadin yadiya.

Logar labe-laben lafke-lafken lafewar  lokon lungunan Lantsandan, don bibiyar batutuwan kasa karkaf, ta yadda za a lalubo bakin zaren karkare al’amuran da ke ci mana tuwo a akwashi, ba tare da ka-ce-na-ce ba, watakila wannan ne dalilin da ya sanya Babanle yake ta yi wa duniya shatale-tale, yana ta kalle-kalle ba tare da waiwayen tsilla-tsillar tsalle-tsallen tsuntsayen saman walle-walle ba.

A dai rika bibiyar kadin wulwulawar tsinkayen hanayen agogo, ban da kai-kawon kango ko kane-kane a kogo. Dimbin al’amura dai an rigaya an hango, sai a hanzarta a shigo, kana a san mene ne ake so a kago. Jibgin jiba ce an rigaya an jibgo. Shin a haka Haurobiyawa ke hankoron zama SANSANIN SINAWA. To a dubi HOGEN KANGO da kyau.

’Yan makarantar Dodorido mahayan shorido, kun dai fasko al’amuran da ke wakana a fadin Haurobiya, musamman a duk lokacin da Baballe ya shalle, ba tare da waiwayen kalle-kalle ba. Kun san yadda ZABI-SONKA ya rikide ya zama ZARI-RUGA. Duk da cewa jam’iyya mai dan boto da sanda jirge ta asassa wannan mumunar ta’adar tun a zamanin jan ragamar Malam Murus Ihu da Farfesa Ja-gaban Zabi-sonka, har zuwa kan Malam Mahamudu, muna ganin wajibinmu ne mu bukaci lallai Babanle ya dan tsahirta da yi wa duniya shatale-tale, musamman a irin wannan yanayi. Sai dai kuma wani hanzari ba rarewa a arce a guje ba, idan akwai manufar kyale ’ya’yan jam’iyya mai alamar tsintsiya su tsuwurwurta tsiwar tsiya-tsiya, don su ji dadin share duk wanda ke son kawo musu cikas ko a sanya ya ci kasa warwas; su kuwa su yi ta cin cukubus da algaragis. Idan kuwa wannan ce manufa, to  ai sai mu ce a ci gaba da gashi….

Ko dai IRO MUGUN MADAMBACI na bukatar agajin LOMA-A-MURDE da MAI-FARI-DA NA-MUJIYA A BAKAR KWALBA, uwa-uba ko sai an lalubo tsohon Gogarma RUBDUGAU, ta yadda za a samu saukin GWAGWAGWAR GWAGWARMAYA DA ARANGAMA DA MASU FASHI DA MUKAMI KO DA DABARBARUN DABARAR DAMFARAR DAMUN-FURA?

DISKON DUHUN-DUNDUM-DURUNDUM na matukar tagayyarar da jama’a, ko dai so ake a ci gaba kada mana taken bakaken Turawan haure-hauren haurewa da Hauron Haurobiyawa. Kai wannan kida ina jin ya zarta na Mai Asharalle, cewa, “kun ji kidan diskon nan irin na Turawa. Yau ku kuke ta damawa,” don haka za a maishe da kasa JAMHURIYYAR JA-NI-INA-RETO ko? MAMUNGAR MABUBBUGAR MAMAMBILA? SHIRMEN SHIRORO SHIRIM? Watakila dai ana tunanin cefanar da wadannan cibiyoyin café laftun lantarki ga AMINTATTUN AMINAN AMAN-KUNU, ta yadda za su ginu, har a daina duk wasu maganganu. A cewar dai Mai Asharalle, “WAR! WAR! WAR! WARE GAJA,” ni kuwa na ce, “a dai wargaje gajiya, mana. Haurobiyawa, kuna ji dai ko?!

Kukan kurcaccaki kammalallen kalamin kankane karatu ne, watakila hankalin Haurobiyawa ya fasko inda aka dosa, don kada a kafa musu kusa, su yi ta suburbuda tusa.

Haurobiyawa, ko da Baban-burin-huriyya yana kai-kawo ya kewaya kai ziyara kasashen ketare, musamman idan ya yi bakam a bukkar Birtaniya, inda yakan yi LOGAR LABE-LABEN LAFKEWAR LOKON LUNGUNAN LANTSANDAN, muna sa ran yana da cikakkiyar masaniya kan irin TANDERUN TANDAR TOYE-TOYEN TURNUKUN TAWAYEN TURKA-TURKAR TAKE-TAKEN TAKUN SAKAR SARKAKIYAR zaman-tattakewa da tattalin tuttule tulin tulu da sunkurun sasarin siyasa da ake tsuwurwurtawa a fadin kasar nan. Lallai a yi mai yiwuwa don gama-garin al’umma su daina kuwwa, ballantana ta haifar musu jin matsin mutsu-mutsun motsin motsa musu tsuwwa. Ko dai so ake magabtan al’umma su ji dadin ci gaba da dira wawa, su kuwa talakawa an gwara kurungunsu su yi ta kokowa?