Jam’iyyar APC ta nada tsohon Gwamnan Oyo Sanata Abiola Ajimobi a matsayin Shugabanta na Kasa na riko.
Kwamitin Amintattun Jam’iyar APC ya nada shi ne bayan Kotun Daukaka Kara ta tabbatar da dakatarwar da aka yi wa Adams Oshiomhole daga shugabantar ta.
Kafin yanzu Ajimobi ne shi ne Mataimakin Shugaban Jam’iyyar APC na Kasa reshen Kudu.
Sanarwar da Sakataren Yada Labaran jam’iyyar Lanre Issa-Onilu ya fitar ta ce karin matsayin ya dace da kundin tsarin mulkin jam’iyyar.
- Gwamnan Edo ya fice daga APC bayan ganawa da Buhari
- PDP na zawarcin Obaseki bayan APC ta hana shi takara
A ranar Litinin 16 ga watan Yunin da muke ciki ne kotun Daukaka Kara da ke zamanta a Abuja ta ta tabbatar da dakatarwar da aka yi wa Adams Oshiomhole a matsayin shugaban jam’iyyar APC na kasa.
A ranar 4 ga watan Maris ne Babbar Kotun Abuja ta dakatar da Oshiomhole daga rike matsayin bisa bukatar wasu ‘ya’yan jam’iyyar su shida daga Edo, jiharsa ta asali.
Daga baya Oshiomhole ya daukaka kara zuwa Kotun Daukaka Kara da ke zamanta a Abuja yana kalubalantar hukuncin.
Sai dai a zamanta na Talata 16 ga watan Yuni, Kotun Daukaka Karar ta amince da hukuncin Babbar Kotun na dakatar da shi.
- Gwamnan Edo ya fice daga APC bayan ganawa da Buhari
- PDP na zawarcin Obaseki bayan APC ta hana shi takara
- APC ta hana gwamnan Edo tsayawa takara
Alkalan Kotun su uku karkashin jagorancin Mai Sharia Monica Dongban-Mensem sun yi watsi da bukatar Oshiomhole ta soke dakatarwar bisa hujjar rashin kwakkwaran dalilai daga bangaren mai daukaka karar.
Hukuncin Kotun na zuwa ne a ranar da Gwamnan Edo mai ci, Godwin Obaseki ya fice daga jam’iyyar APC bayan ta hana shi neman takarar zaben gwamnan jihar bisa zargin takardunsa na da matsala.
Obaseki ya sanar da ficewarsa daga jam’iyyar APC ne bayan ganawarsa da Shugaban Ma’aikatan Fadar Shugaban Kasa, Ibrahim Gambari a Fadar Shugaban Kasa, domin neman mafita daga hana shi takarar.
Kwamitin Tantance ‘Yan Takarar Gwamnan Jam’iyyar APC a jihar Edo ya ce ya hana gwamnan sake tsayawa takara ne saboda bambance-bambance da ya gano a takardunsa.
