Categories: Muhawara

Wasan dambe da kokawa wanne ya fi burge ka?

Wasanin dambe ko kokawa na daya daga cikin wasannin gargajiya da jama’a da dama suke nuna sha’awarsu a kai. Za a ga ana fafatawa a tsakanin matasa majiya karfi don sa al’umma nishadi walau a wajen bukukuwan Sallah ko kuma a hada gasa a saka kyaututtuka ga duk wanda ya samu nasara. Ganin muhimmancin wasannin ya sa wakilanmu suka jiyo ra’ayoyin mutane a kan wanne ne ya fi nishadantar da su a tsakanin dambe da kokawa?

Kokawa ta fi dambe saka nishadi ga mai kallo – Muhammad Sani Isah (Sani King) Layin Allasure, Kano

ADVERTISEMENT

Daga Faruk Tahir Maigari

Idan aka dubi kokawa ta fi saka nishadi domin za ka ga dan karamin mutum ya wulwula kato sama ya fyada shi da kasa.Ana amfani da tsabar hikima ce ba wai karfi ba, girman mutum ba ya sawa ka ce shi zai yi nasara dole sai an fafata ake sanin jarumi.

ADVERTISEMENT

Kokawa ta fi sa nishadi – Ali Dan Baba

Daga Musa Kutama, Kalaba

Magana ta gaskiya ni dai gara wasan kokawa ya fi nishadantar da ni ya fi kuma burge ni domin saboda za a yi taga-taga a tsakanin ’yan wasa. Shi kuwa  dambe duk inda ka samu naushewa za ka yi. Kokawa kuwa wata dabara ce  da ake hada jiki har a yi kaye.

Dambe ya fi kokawa sanya nishadi –  Ibrahim Adamu (scorer) Mai aski, Tudun Maliki, Kano

Daga Faruk Tahir Maigari

Ni a ra’ayina dambe ya fi kokawa burgewa da sa nishadi a zukata. Duk wani jarumi zai yarda da ni cewa dambe ya fi nuna jarumta da bajinta domin idan ka yi dubi da yadda ake amfani da karfi da hikima a lokaci guda, za ka ga a cikin lokaci kankane za a yi shi a gama ba tare da kosawar mai kallo ba. Sabanin kokawa da za ka ga wani lokacin an dauki kusan sa’a guda ana fafatawa.

Dambe ya fi kokawa – Uba Sale Mainama Bakin Kasuwar Bolori

Daga Muhammad Aminu Ahmad

Ni a ra’ayina dambe ya fi kokawa, ya fi sa ni cikin nishadi. Domin nakan dauki nauyin ’yan dambe tun daga Legas a zo nan Maiduguri a yi wasan dambe. Mu sa kyaututtuka ga duk dan damben da ya yi nasara kai har mota na taba sa wa don sha’awata ga wasan dambe. Gaskiya babu ma hadi a tsakanin wasan dambe da kokawa, dambe ya fi sa nishadi.

Dambe ya fi nishadi – Muhammad Kabiru

Daga Musa kutama, kalaba

Ni gaskiya dambe ya fi nishadantar da ni ya kuma fi burge ni. Saboda shi ne wasan da duk wanda ya je ya kalla sai ya dawo da nishadi a ransa. Kuma wasa ne na masu karfi dalilin da ya sa ke nan ya fi nishadantar da ni ya fi burge ni.

Gaskiya dambe ya fi –Muhammad Sani Bakin Kasuwar Bolori

Daga Muhammad Aminu Ahmad

Alhamdulillahi gaskiya dambe ya fi nishadantar da ni, saboda tun ina karami nake sha’awar wasan dambe nake gani ake yi a gabana. Kullum idan ina kallon wasan dambe yana kara min jin dadi. Kuma na fi sha’awarsa a kan wasan kokawa, don muhimmancinsa har Makkah ake kai mutum a kan wasan dambe don akwai albarka a cikinsa.

. .

Recent Posts

An rantsar da sabon Mataimakin Gwamnan Kogi

Duk an kammala shirye-shiryen rantsar da Edward Onoja a matsayin sabon Mataimakin Gwamnan jihar Kogi. Babban alkalin jihar Nasir Ajanah,…

6 hours ago

Yau Buhari zai ziyarci kasar Rasha don halartar taro

A yau Litinin shugaban Najeriya Muhammadu Buhari, zai ziyarci birnin Sochi a kasar Rasha don halartar taron  kwana uku wanda…

6 hours ago

Matashin da ke sace kudin coci ya shiga hannu

Wani matashi da ake zargi da sace kudin da ake tarawa na sadaka a cocin "Divine church of God" a…

7 hours ago

‘Yan Sanda sun bada belin Malam Niga a Kaduna

Rundunar 'Yan Sandan Jihar Kaduna ta bayar da belin Malam Lawal Yusuf Muduru da aka fisani da Malam Niga wanda…

19 hours ago

An yi garkuwa da Mataimakin Kwamishinan ‘Yan sanda

Rundunar ‘yan sanda ta tabbatar da yin garkuwa Kwamandan shiyyar Karamar Hukumar Suleja kuma Mataimakin Kwamishinan ‘yan sanda ACP Musa…

1 day ago

An gano zakin da ya tsere daga gidan zoo na Kano

Bayan shafe daren jiya ana neman wani rikakken zaki da ya kufce daga gidansa a gidan namun daji na Kano,…

1 day ago