Girke-girke ne
Sanwa suna ne
Rabashen ragadada kowane
Rubdugun rudi kankane
Dandanon difarar dadi wanne ne
Kar ai yamadidin ce-ce-ku-ce
Dodorido yai fice
Wajen kirkira zance
Ko zaman zugar zauren zaurance
Dodo ne dai mai kwatance
A dai kaifafa zukatan tunani
Abin da ya kamata ai tuntuni
Kar a tsahirta wa malami masani
Gannan na-mujiya na iya gani
Batun ci-makar ciyayyar cin makani
An yi ikrarin rahusa
A dai hura a busa
Ka da tausar bodari ta turo tusa
A dan taushe da tausa
Kar a nuna gajiyawa a kasa
Yayyafi
Yafen yarfen yafi
Yaukaka yunkurin yaren yarfi
Yamadidin maganganun rufi
Yari-yarin yadiyar tsinin tsafi
’Yar tsala
Tsilla tsillar tsallen tsula
Tsinken tsallen tsagwaron tsunkula
Tsakure-tsakuren tsaron tsadar tsawwala
Tsammanin tsomomuwar tsimin tsumulmula
Tsautsayin tsimin tsiwar tsiya-tsiya
Ya damu da gaya
Kokon kunun tsamiya
Tumbatsar tukawar tumbin Tambaya
Turnukun tafarfasasshen hatsin hadidiya
Dambun dungun dambacewar damatsa
Tubanin tunkudo tumbin tumbatsa
Waskon wasa-wasar wartsakewa watsa-watsa
Gingimemiyar gurasar gutsira gatsa-gatsa
Lamurjen lemun lamusar lotsin latsin lotsa
Dabge
Da dage-dage
Duddugar duga-dugi doge
Durar dirkaniyar dibge
Dandanon dige-dige
Danwake da mai da yaji
Maganin mai rangaji
Gumurzun gwaramar Gogaji
Wadakar wargje wujijjigar Wargaji
Karime-karimen kamun kaji
An dai yi kalaci
An samu abin ci
Abin sha ba kunci
Tsawwalar tsada ba sassauci
Tsaka-tsakin tsakurar tsokaci
Talalar talauci
Tulin takaici
Dandani haukaci
Dari-darin hukunci
Haba-haban habaici
Kamun ludayi
Katantawar laulayi
Kiren kirgin kaikayi
Janjamin juriyar jama’ar juyi
Bangaje-bangajen bugun bayi
Yaushe za a daina kidahumanci
A zo ai adalci
A kawar da jahilci
A daina nuna bambanci
A mutunta kowa da mutunci
Kurungun matsala ya kunno
Ka’idar Karin kumallo
A samu koko da gayan kwallo
‘yar marar tuwo a mulmulo
Da rana a kwankwadi fura da nono
Yayimen-yayimen yaukaka yamadidi
Rangajin rumurmutsar ridi
Bikin bararrajewar barbadi
Camamar cinikin cukudi-cukudi
ci-makar cinkon cabin cin kudi
cabin cude-cuden cudi
rarume-rarumen rudi
raurawar rurin rade-radin radi
kwat-kwat kwankwadar na-kwadi
mahukunta a sammana sudi
mai kalangu yai kidi
mawaki mai yawan kaudi
sankira kirarinsa yai dadi
ba tsula madi
yadon yadiyar yadi
Bari batun bana balle badi
’Yan lalle na ta tadi
Adon-gari na zakwadi
Tsohuwa dai ta iya kadi
Tsokacinta shi ag gargadi
Sangarcewar sufurin safarar samfarera
Shasshekar sheke shanshera
Shuke-shuken shekara
Shashancin shantakewar shakara
Sunkurun sakarcin sake shawara
Tattagar tawagar Tayar-Landan
Kwashe-kwashen kayan Lantsandan
Ana ta budun-budun
Tulin tantakwashi na nan
Ko kun cinye saura kadan
Burgar bankar buskin-mati
Tulin taliyar tanti
Makaronin kanti
Kayan dadi a faranti
An jera ana ta fareti
Farfesun faskarar fakarar fama
Fargabar fahimtar fankama
Furkaniyar faskar farankama
Fama-faman fagamniyar fangima
Falle fuka-fukin filfilon fantama
Rani da damina
Harkar hatsi ake magana
Ina mai gayauna
Yaushe kake gyara gona
Kawai ka shantake ka zauna
Kayan dundume kururu na hauhawa
Da farshin kaya ake kokowa
Motsin mutsttsukar matsolon motsuwa
Yankwane-yankwanen yunwa
Yarfen yaren yanyawa
Kantin kayan kwalama
Makwalashen moriyar manema
Mutane masu makama
Hakin hakilon hazartan himma
Batun burungujin burgamen birgima
Tereren takaddama
Tinkahon takun takama
Tinjimin tunbatsar tama
Takurar tunzura tuma
Tababar tantama
Kintacen kasassaba
Karambanin kwaba
Jigari-jigarin jibgin jiba
Soki-burutsun saba
Salon sabulun sassaba
Nomau na-manomi
Ka rike mukami
Kana kokarin motsa mukamuki
Kar ka haifar mana tarnaki
A kasa a zo ana jimami
Ka daina kimanta kudin koto
Hauro kofar hanci da zagaye
Za su ciyar da gari ya waye
Kafin hantsi yai kaye
A karke da cinikin toto
Mai dangauda da tubani
Kina ta yi iyaye da kakanni
Yanke miki ciniki ba tunani
Ki ta cura babba da kankani
Saye da sayarwa ba wuni-wuni
Manya ban da bambami
Ko mayen barasar mukami
Ai ta kwada wa jama’a sungumi
Ga damuwar dundumi
A wajen babba da karami
An dai haifar da jimurda
Mutane na rade-radin rada
An maishe da batu gada
Kowane sako batu ya sadada
Ana shan suburbuda
A kara yi wa mai gayauna agaji
Kar a ce an gaji
Ai yunkuri fardar daji
Ai ta himar kiwon kaji
A yi da karfin tada kwanji
A samar da taki
Yawansa ya zarta cikin taiki
Ya fi karfin dakon jaki
Ai zubi shukar ban mamaki
Mamakon yabanya ne batun baki
Karsana da nagge
Nono a nannage
Manshanu ba kage
Fadin fata ya fi karfin lage
Ai nashe-nashe bakuna a wage
Ba batun kage
Babu kwange
Ko kure kiren kanzon kurege
Ko artabun bera da mage
Sha’ani ne na hange-hange
Ciyayyar cin cukubus
Kalacin Karin kumallon kicibis
Aiken amsar alkubus
Barbaden garin bududus
Kwaramniyar kwasar kuskus
Garin kwaki a huta
Curin mandako ba karanta
Kwadon zogale kar a manta
Rama hana ramar mai mata
Rumurmutsar rummace na kwadaita
Tattasai da tumatur
’Ya’yan itacen fasa-dabur
Torokon tinkahon Tukur
Bambamim burka babur
A filin ta-mola a hura usur
A samar da naman bisashe
Mu ci mui lashe-lashe
Bakuna sui nashe-nashe
Mu koshi mu bar kwashe-kwashe
Fuskokinmu su washe
Mai tsiren duniya
Dakon dakon dukiya
Damarar daukar dawainiya
Karajin kullin kugin kugiya
Ruftawar rufin rijiya
Manyan maciya
Malmalar marar tuwon toliya
Murjin mukekiyar muciya
Mamakon masakin makauniya
Makarar makoshin miskiniya
Manya ai furucin ingarma
Batu mai makama
Komai ya samu tushen zama
Ban da rangajin rungumar rigima
A dai kyautata rikon ragama
Jama’a na cin kwadon rogo
Wasu na gararamba da dankoko
Cikinsu har da mai makoko
Akwai masu fama da mashako
Ga shi an aiko muku sako
Ku kuwa kun make a fako
Mutane na son su leko
Ku dan yi musu wani abu a jinko
Ku kyautata halin riko
Sai ku hana mabukata roko
Girma-girma a kwatanta
Ai hankali a kimanta
Kar a maishemu malalata
Akwai dimbin matalauta
Taimakon jama’a sai a daidaita
Bar batun wane ya ji ga wane
Ko dan wanene
Mu mike ka da mui zaune
Da na-mujiyarmu a kanne
Kowace harka mui kane-kane
A kauce wa dabarbarun ’yan sane
Masu tono binne-binne
Lamarinsu sananne ne
Don sukan haifar da zubar jinane
A karke da hande on bone
A daina terere
A zo ai kere-kere
Garmar gararumar gare-gare
Gundumar gungurawar gangare
Gunjin gwajajabar gyare-gyare
Abincin acici a arha
Rangwamen rahusa
Tumbin tukkuicin tusa
Tallace-tallacen tasa
Masu ciyayya sui masalaha
A fitar da kudin ciyar da jama’a
Tabahuwa a ce mata a’a
Kada kugin ciki ya zama kira’a
Lallai an taki sa’a
Don batun babu ba’a
An dai yi faman fatara
Karkara ana kakarar kara
Birane an rage tabara
Mahunkuntan nisan kin jin kira
Shi ya sa tallafi ya faskara
’Yan uwa ka da a kagara
A yi ta juriyar jira
Mahukunta ka da a makara
A daina kwado da dara
Sai al’umma ta sarara
Mun dai samu rahoto
An bude katafaren gidan koto
Ana hada-hada loto-loto
Dimbin jama’a can aka karkato
’yan dugwi-dugwi har da katoto
Ahir dinku masu neman na-bagas
Da masu cin bulus
Sai an lallaga muku jikkuna lilis
Ku dai kiyayi aikin ibilis
Ku fito da mtsabbai ban da kus-kus
Sai a samu na cin algaragis
Kar a ruguzo rigis
A dai samu karfin takun tinkis-tinkis
A fafata da tabahuwa ai ragas
Cin modar gasa ko ai canjaras!
