Wani doki mallakar marigayi Wagner de Lima Figueiredo da ya rasu kuma ake shirin binne shi, ya sanya ’yan uwan mai shi cikin tausayi bayan da ya je kusa da gawar ya dora kansa a kan gawar yanazubar da hawaye don nuna alhinin wannan babban rashi.
Dokin mai suna Sereno ya bai wa ’yan uwan Wagner mamaki, inda hakan ya sa dan uwan Wagner, mai suna Wando de Lima ya tafi da dokin makabartar da za a binne Wagner a garin Paraiba da ke Arewa maso Gabashin kasar Brazil.
Rahoto ya ce, dokin da Wagner sun yi matukar shakuwa, kamar yadda wadanda suka san su tare suka bayyana.
Mista De Lima ya ce, dubban jama’a sun ta wallafa wannan shakuwar da dokin ya yi da Wagner a shafukan Intanet. Ya ce, “Kamar dokin ya san Wagner ya rasu don haka yake ta yi masa ban-kwana, saboda wannan dokin na yi wa Wagner duk abin da yake so.”
Wagner de Lima Figueiredo ya rasu ne a hadarin babur lokacin bukukuwan sabuwar shekara bayan da babur din ya kwace masa yana kansa a birnin.
